آسٹریلیا کے سابق لیفٹ آرم اسپنر بریڈ ہوگ نے اپنی آل ٹائم الیون کا اعلان کردیا ہے جس میں 2 پاکستانی لیجنڈز ورلڈکپ وننگ کپتان عمران خان اور سابق کپتان جاوید میانداد شامل ہیں۔

تفصیلات کے مطابق 49 سالہ بریڈ ہوگ کے ایک مداح نے ٹوئٹر پر ان سے اپنی آل ٹائم ٹیسٹ الیون سے متعلق پوچھا جس پر انہوں نے اپنی آل ٹائم الیون کے نام بتائے۔

ان کی آل ٹائم الیون میں ویسٹ انڈیز کے 4، پاکستان، بھارت اور انگلینڈ کے 2، 2 جبکہ آسٹریلیا کا ایک کھلاڑی شامل ہے۔

یہ بھی پڑھیئے: آسٹریلوی آل راؤنڈر نے عماد وسیم کو پانڈیا سے بہتر آل راؤنڈر قرار دے دیا

بریڈ ہوگ کی آل ٹائم الیون میں جاوید میانداد، سنیل گواسکر، سر ویوین رچرڈز، برائن لارا، سچن ٹنڈولکر، ڈیوڈ گوور، جیک رسل، عمران خان، جوئل گارنر، مالکوم مارشل اور شین وارن شامل ہیں۔

واضح رہے کہ بریڈ ہوگ نے کینگروز کی نمائندگی کرتے ہوئے 7 ٹیسٹ، 124 ون ڈے اور 15 ٹی ٹوئنٹی میچز کھیلے جس میں بالترتیب 186، 812 اور 54 رنز اسکور کئے۔ اس کے علاوہ لیفٹ آرم چائنا مین نے ٹیسٹ میں 17، ون ڈے میں 157 اور ٹی ٹوئنٹی کرکٹ میں 7 شکار بھی کئے۔